GUK EMANEZ, HAIEK BIZI!

 Hezur-muinaren transplantearen bidez hainbat gaixotasun tratatu ahal dira, hala nola leuzemia. Dakikezuenez, edozein transplante egin ahal izateko, beharrezkoa da aldez aurrez donazio bat egotea, eta kasu hauetan donazioak ez dira hain sarri egiten, agian emailearen ezjakintasunarengatik, izan ere, garrantzitsua da jakitea, hezur muinaren donazioa ez dela besteorgano batzuen donazioaren modukoa. Animatzen bazarete, norberaren erreferentziazko ospitalean egin daitezke tramite guztiak, eta ez da ez arriskurik ez eta minik ere egongo. Bertan azalpen guztiak emango dizkizuete eta ohiko analisietan egiten den bezala odola aterako dizuete. Gero, zuen datuak erregistratu egingo dira unibertsala den hezur muinaren banku batean eta hortik aurrera itxaron baino ez duzue egin behar. Munduko edozein herrialdetako gaixo batek hezur-muin bat behar duenean, banku horretara joko dute bere muinarekin konpatiblea den beste bat bilatzeko. Zorte apur batekin zuena izan daiteke eta horrela bada, deitu egingo zaituztete eta modu horretan pertsona bati bizirik jarraitzeko aukera emango diozue.GUK EMANEZ HAIEK BIZI! da kanpainaren leloa. Niri oparitu zidaten kamiseta berde polit batean daukat idatzita, eta seguruenik, hemendik aurrera maiz ikusiko dituzue kalean horrelako kamisetak daramatzan pertsonak. Jakina, zenbat eta emaile gehiago egon, orduan eta hobeto gaixotasuna duenarentzat. Horregatik da oso garrantzitsua emaile egitea, izan ere guk ematean haiek biziko dira, eta bizitza gauzarik preziatuena da, hemen eta mundu bazterreko beste edozein txokotan.